దోమలు ఉన్నాయంటూ..ఇంటి యజమానికి కోర్టు జరిమానా!

కేరళలో ఇరింగలకుడ మురియాడ్‌ పుల్లూర్‌కు చెందిన ఓ వ్యక్తి, తన ఇంటి పరిసరాల్లో దోమలు విపరీతంగా పెరగడానికి కారణం అయినందుకు కోర్టు అతనికి రూ.2000 జరిమానా విధించింది. బ్లాక్‌ కుటుంబస్ధ్యకేంద్రం సూపర్‌వైజర్‌ జోబి దాఖలు చేసిన పిటిషన్‌పై ఇరింగలకుడ ఫస్ట్‌క్లాస్‌ జ్యుడీషియల్‌ మేజిస్ట్రేట్‌ కోర్టు ఈ శిక్షను ఖరారు చేసింది. కేరళ పబ్లిక్‌ హెల్త్‌ యాక్ట్‌ 2023 ప్రకారం రాష్ట్రంలో ఇలాంటిది ఇదే మొదటి తీర్పు అని ఆరోగ్య శాఖ తెలిపింది.ఇరింగలకుడ మురియాడ్‌ పుల్లూర్‌ ప్రాంతంలో డెంగ్యూ జ్వరాలు విపరీతంగా వ్యాపించడంతో దోమలు వృద్ధి చెందకుండా చూడాలని వైద్యారోగ్యశాఖ ఆదేశాలు జారీ చేసింది. మురియాడ్‌కి చెందిన వ్యక్తి.. ఈ విషయంలో విఫలమవడంతో హెల్త్‌ సూపర్‌వైజర్‌ ఆయనపై కేసు పెట్టారు. అతని ఇంట్లో దోమల బెడద పెరిగే పరిస్థితులు నెలకొన్నాయని, శుభ్రం చేసేందుకు ఇంటి ఓనర్‌ సిద్ధంగా లేరని ఆరోగ్య పర్యవేక్షకుడు నివేదిక ఇచ్చారు.కేరళ ప్రజారోగ్య చట్టం కింద కేసు నమోదైంది. జూన్‌ 26న ఈ కేసు కోర్టు ముందుకు వచ్చింది. విచారణ జరిపి జరిమానా విధించింది.